Radonjic, i kënaqur nga miqësorja e Vllaznisë
Posted by FSH on 29/07/2010 14:04

---

Trajneri malazez, edhe pse kuqeblutë kanë humbur 0-1 me Boracin, ka folur mirë për lojtarët Share

---

Extended News

---

Humbja në miqësoren e parë të luajtur në Serbi nuk i ka dëshpëruar drejtuesit e Vllaznisë. Përkundrazi, trajneri Radonjiç dhe stafi i tij kanë krijuar përshtypje të mirë për mënyrën si ka reaguar skuadra në fushën e lojës. Ndeshja e parë miqësore e luajtur në Zllatibor ka qenë ajo e pasdites të së martës.

Përballë ka qenë një nga ekipet më të mira të Bosnjës, pikërisht Borac i Novi Sadit, që vinte pas pjesëmarrjes në Ligën e Europës, ku ishte eliminuar për efekt golaverazhi nga zviceranët e Lozanës. Boshnjakët ishin thuajse në formën e tyre më të mirë, ndërkohë që shkodranët sapo kanë nisur javën e tretë të stërvitjes dhe janë ende në fazën e marrjes së ngarkesave.

Kjo e fundit ka kushtëzuar jo pak edhe paraqitjen e kuqebluve në fushë, sepse asnjëri prej tyre nuk mund t’i luajë 90 minuta të plota. Përpos kësaj, në miqësoren ndaj Boracit edhe formacioni i Vllaznisë nuk ka qenë i plotë. Nuk ka luajtur Sinani, që vazhdon një program të veçantë stërvitjeje, me qëllim kapjen e ritmit të grupit dhe po ashtu, nuk ka luajtur as një nga lojtarët më të mirë të mesfushës, kosovari Nallbani.

Ky i fundit ka pasur një problem të vogël dëmtimi dhe prandaj nuk është aktivizuar asnjë minutë. Nga ana tjetër, dy të ardhurit e fundit të merkatos kuqeblu, Kukaj dhe Nimani, kanë luajtur vetëm në pjesën e dytë. Formacioni që trajneri Radonjiç ka hedhur në fushë e që mund të quhet për momentin formacioni titullar ka qenë i përbërë nga Vujadinoviç në portë, në mbrojtje kanë luajtur Smajli, Kraja, Rajoviç dhe Gocaj

. Në mesfushë kanë luajtur Sykaj, Belisha, Hasani, Shtubina, ndërkohë që në sulm ishin kroati Jumiç me Kaçin, më të tërhequr pak. Pjesa e parë e ndeshjes ka qenë më e bukur. E shoqëruar edhe me raste për shkodranët, të cilët përgjithësisht janë paraqitur mirë. Me fillimin e pjesës së dytë, trajneri Radonjiç ka hedhur në fushë një 11 she të dytë.

Nuk ka vepruar kështu kundërshtari, i cili vetëm në minutat e fundit të ndeshjes ka bërë disa zëvendësime. Goli i shënuar në minutat e fundit nga i ka dhënë fitoren ekipit Borac, megjithatë në kampin e Vllaznisë nuk kanë qenë fare të shqetësuar nga humbja. Duke folur përmes telefonit nga Serbia, zëvendëstrajneri Elvis Plori, ka thënë: “Mendoj se skuadra jonë është paraqitur mirë, nisur nga momenti i stërvitjes ku jemi.

Natyrisht, nuk jemi ende në formën tonë më të mirë dhe po ashtu po punojmë për konsolidimin e formacionit. Kemi ushtruar më tepër presion se kundërshtari dhe vetëm në pjesën e dytë mund të them se kemi humbur pak terren, si pasojë edhe e shumë ndërrimeve që bëmë.

E rëndësishme është që kjo miqësore ia arriti qëllimit dhe nga ndeshja në ndeshje besoj se niveli i skuadrës do të vijë duke u rritur.” Në Serbi ekipi i Vllaznisë do të zhvillojë disa ndeshje miqësore dhe gjatë tyre stafi drejtues do të kërkojë rritjen e nivelit të skuadrës dhe bërjen gati të saj për nisjen e sezonit të ri. (Sporti Shqiptar) Share