Tirana ka fituar dje me rezultatin 2-1 në derbin për ballë rivalit historik, Partizanit, duke shënuar kështu një minihakmarrje për dy disfatat e pësuara edicionin e kaluar. Një fitore ajo e djeshmja e bardhebluve që, gjithsesi, ka qenë aq e zbehtë, sa nuk është ndikuar thuajse aspak nga emrat e mëdhenj në kontingjent, milionat e shpenzuar, dobësimi i kundërshtarit më të betuar në merkato, Partizanit, dhe as inferioriteti numerik i të kuqve gjatë gjithë pjesës së dytë të takimit.

Realisht ka qenë vetëm fati ai që dje ka mbajtur ngjyrat bardheblu, duke favorizuar Tiranën në atë fitore të sekondave të fundit. Një gol në minutën e 90’ për bardheblutë dhe një traversë në të 94’ për Partizanin, janë dy detajet që dëshmojnë më së miri mënyrën se si është përcaktuar fati i këtij derbi. Nga ana tjetër, skuadra e Partizanit që nuk shihej aspak si favorite në këtë duel, pasi konsiderohej thuajse e zhveshur pas largimit të ishtitullarëve e liderëve të sezonit të kaluar, i ka rivalizuar dje bardheblutë mëse denjësisht.

Treshja braziliane e prezantuar në përballjen e djeshme, njëlloj si me një shkop magjik ka ndërtuar një Partizan pretendent dhe në disa raste superior ndaj Tiranës, ndonëse suksesi i tyre u limitua vetëm në pësimin e një humbjeje dinjitoze përballë bardhebluve. Tirana superiore në mënyrë të ndjeshme ndaj Partizanit gjatë të gjithë pjesës së parë të takimit, ka arritur të kalojë në avantazh që në minutën e 20’ me anë të Xhafajt. Krejt ndryshe nga fraksioni i parë i lojës, pjesa e dytë e ka shfaqur një Partizan më ofensiv, pavarësisht inferioritetit numerik pas daljes së Kalarit me karton të kuq që në minutën e 47’.

Një ritëm loje i të kuqve ky, që është shpërblyer me golin e shënuar nga Bruno në minutën e 59’. Ndërkohë Tirana, ndonëse superiore numerikisht, ka zhvilluar një lojë jo pak të çorientuar. Megjithatë, falë një presingu në zonën e të kuqve në minutën e 90’, bardheblutë kanë kaluar në avantazh me një gol të Andi Lilës, që ka qëndruar në fuqi, duke i dhënë Tiranës fitoren, pavarësisht përpjekjes së fundit të Partizanit në të 94’, kur Bakaj goditi traversën e portës së mbrojtur nga Nallbani.

Minutat
3’ - Brenda vetëm një minute, skuadra e Partizanit rrezikon portën bardheblu me të njëjtin protagonist, brazilianin Roma, i cili nuk arrin të finalizojë me gol.
8’ - Është A.Lila që kroson nga e djathta për Memellin në zonë, i cili godet me kokë dhe realizon, por gjyqtari anulon golin.
19’ - Është sërish Agolli që shërben nga e majta një top në gjysmë lartësie për Xhafajn e pafat, që gjuan dhe godet shtyllën.
20’ - Xhafaj korrigjon gabimin dhe arrin të realizojë golin e avantazhit për Tiranën. I vetëm përballë Shehit, sulmuesi vlonjat tregohet i saktë dhe dërgon topin në rrjetë.
32’ - Brazilianët e Partizanit dhurojnë spektakël dhe rrezikojnë portën e Tiranës. Është Roma ai që dhuron një asist në zonë për Brunon, i cili shumë pranë portës i vetëm përballë Nallbanit gjuan fort, por mbi traversë.
49’ - Partizani sulmon me brazilianin Roma, i cili në hyrje të zonës gjuan fort, por pret Nallbani.
59’ - Braziliani Bruno përfiton maksimalisht nga një gabim i Kcirës në mbrojtje dhe i vetëm përballë Nallbanit dërgon topin në rrjetë, duke barazuar shifrat në 1-1.
70’ - Memelli pason te Muzaka. i cili kroson në zonë për Xhafajn që godet me kokë, por grushton fort Shehi.
90’ - Andi Lila bën mrekullinë dhe kalon Tiranën sërish në avantazh, pasi shfrytëzon më së miri krosin e Muzakës.
90’+4 - Fati nuk është me Partizanin dhe Bakajn, i cili në momentet e fundit të takimit, me një gjuajtje në hyrje të zonës, godet traversën e portës së Tiranës.

Tirana - Partizani 2-1

Golat: Xhafaj 20', A.Lila 90'/ Bruno 59'
Tirana: Nallbani, Abraham (21' Kcira), Osmani, Dabulla (49' Pashaj), A.Lila, Agolli, Devolli, Pezo, S.Lila (62' Muzaka), Memelli, Xhafaj Trajner: Blaz Slishkoviç
Partizani: Shehi, Hallaçi, Tafaj, Gjyla, Pinari, Karapici, Kalari, Bakaj, Bruno, Kastelani (63' Capo), Roma (78' Ngjela) Trajner: Genc Tomorri
Gjyqtaret: Ervis Peza, Genc Maloku, Sokol Avdo
K. te verdhe: Nallbani, A.Lila, Devolli, Pezo/ Tafaj, Kalari.
K. te kuq: Kalari

14 Shtator 2008