Të paktën për një ditë, në kampin e Partizanit është vendosur “paqja” përsa i takon frontit të tifozëve, megjithatë gjendja përreth skuadrës vazhdon të nxehet. Sikur të mos mjaftonin largimet e deritanishme, nën zë edhe një pjesë e lojtarëve të mbetur kanë lënë të kuptohet idenë që kanë për të lëvizur, pasi durimi ka sosur. Megjithëse vazhdojnë të paraqiten në stërvitje, më tepër me qëllimin për të mbajtur veten në formën e përshtatshme fizike.

Madje në ndryshim nga një ditë më parë, në seancën e zhvilluar pasditen e djeshme, janë paraqitur edhe Elis Bakaj e Rahman Hallaçi. Kjo është perceptuar si një sinjal pozitiv nga ato pak tifozë të pranishëm, megjithatë duket se në të vërtetë për asnjërin prej tyre nuk do të thotë se është shuar ideja e largimit, po ashtu si për pjesën tjetër të atij grupi lojtarësh që kanë mbetur nga sezoni i kaluar. Vërtet mund të kenë ende kontrata me klubin e kuq, megjithatë në bazë të rregullores, përderisa nuk paguhen prej pesë muajsh, kanë të drejtën e prishjes së njëanëshme.

Klubi
Presidenti Xhani, pasi hodhi “gurin” në përfundim të ndeshjes me Shirokin, duket se ka “fshehur dorën”. Të paktën fizikisht vazhdon të mos shfaqet në klub, pavarësisht se si zakonisht mund të lëshojë vetëm fjalë në distancë. Ndërkohë, vetë ata drejtues që duken në klub, nga tekniku Lika e deri te zv./presidenti Birçe, duken të vetëdijshëm se gjendja nuk është aspak e mirë. E megjithatë, për momentin nuk duket se kanë ndërmend të dorëzohen lehtë. Ndonëse nëse gjërat do të vijojnë të përkeqësohen nuk përjashtohet edhe që sidomos trajneri të vendosë të shkëputet. Sidoqoftë, deri tani, sipas burimeve afër klubit të kuq, mësohet se ideja është për realizimin e një fushate përforcimi pa emra të mëdhenj. Qëllimi është afrimi i 4-5 lojtarëve, të cilët mund të jenë të rinj, edhe pa shumë përvojë, por mbi të gjitha kërkohen të denjë për të veshur fanelën e kuqe. Sipas krerëve të klubit, kaq do të mjaftonte për të plotësuar kontigjentin aktual dhe për të realizuar një sezon dinjitoz. Por çështja për momentin është nëse do të qëndrojnë edhe ata futbollistë, që kanë mbetur aktualisht në stërvitje? .

6 Gusht 2008