Korçari Klejdi Larti është nga të parët, i larguar nga skuadra e “demave”. “Ka qenë deshira e tij për të mos qenë më tej pjesë e skuadrës” thotë Lika, pa treguar më shumë për këtë veprim. Burime pranë lojtarit thonë se Larti nuk e ka pritur mirë lënien në tribunë në ndeshjen e parë me Shiroki Brijeg, ndaj dhe nuk e ka parë më të udhës të jetë pjesë e Partizanit. Sidoqoftë, të njëjtat burime thonë se Larti ka një kontratë trevjeçare me këtë skuader, të cilën deri tani korçari nuk ka treguar interes për ta prishur, edhe në rrethana kur Lika thotë se “lojtari ka kërkuar vetë të largohet”.

Gjithsesi, të bën përshtypje fakti që lojtari ka firmosur një kontratë me këtë ekip, disa ditë para se të niste stërvitjen me të, ashtu si kishin bërë edhe dy korçarët e tjerë, Ngjela e Çajku. Këtë e ka ditur edhe Lika, që flitet se i ka bërë të ditur lojtarit se nuk është në planet e tij, çka duhet ta kishte bërë përpara se korçari të firmoste kontratën, që ka dhe një kosto ekonomike për presidentin Xhani. Qoftë dhe për të mos pasur probleme të kësaj natyre, Lika duhet t’i kishte kërkuar Xhanit përpara se të firmosnin, që lojtarët e ardhur t’i shikonte në stërvitje, edhe për t’u bindur si trajner për atë që ata ishin në gjendje të bënin. .

25 Korrik 2008