Këto ditë pritet të jenë edhe më të gjatat për skuadrën e Partizanit, stafin teknik, por edhe tifozët e “demave”. Pas largmit “de fakto” edhe pse ende jo përfundimtar të portierit Orges Shehi, dje mesfushori gjirokastrit i të kuqve të Likës, Bledar Devolli, i ka dhënë zyrtarisht fund aventurës së tij me Partizanin. Një gjë të tillë lojtari e ka pohuar vetë, teksa, pas një bisede që ai ka patur me presidentin e skuadrës, Albert Xhanin, të dy kanë gjetur gjuhën e përbashkët dhe kanë vendosur që lojtari, i cili arriti të pushtonte zemrat e mijëra tifozëve të “demave”, pikërisht pas atij superderbi me Tiranën (të fituar 4﷓1 nga djemtë e Likës, ku Devolli shënoi edhe një gol), të prishë pa asnjë dëmshpërblim kontratën trevjeçare me Partizanin.

“Kam folur me Xhanin dhe e falenderoj shumë që arriti të më kuptonte dhe të më linte të lirë. Unë e kisha bërë zgjedhjen time më parë, kur kam deklaruar publikisht se nuk dua të qëndroj më tek të kuqtë. Por sot (dje) më në fund arrita të jem një lojtar i lirë, pas bisedës që pata me presidentin Xhani”, knë qenë fjalët e Devollit. Dihej prej kohësh që gjirokastriti nuk do të qëndronte tek “demat” dhe problemi i vetëm ishte kontrata e tij, çka pritej të zgjidhej pas kupës UEFA. Por, tani duket se gjithçka ka përfunduar dhe Devolli mund të shkojë në cilëndo skuadër me parametër zero. E ardhmja? “Kam dy-tre oferta nga kampionati shqiptar, por nuk kam vendosur ende”, të sqaron Devolli. Destinacioni i tij i ardhshëm? Ndoshta, ose me shumë mundësi Tirana. .

25 Qershor 2008