Kur më pak pritej, Enco Malindi i ka dhënë fund aventurës me Partizanin. Sinjali i ardhur nga shtypi bullgar ka rezultuar pozitiv, megjithëse ishte folur për një lëvizje të sulmuesit që gjatë fundjavës së kaluar. Në të vërtetë duket se vetë sulmuesi ka qenë në pritje të vazhdueshme që udhëtimi i tij të konkretizohej. Ja që vizën bullgare ka mundur ta sigurojë vetëm dje në drekë, atëherë kur krejt befasisht ka lënë stërvitjen e Partizanit dhe është larguar drejt ambasadës. Ndërsa, sot do të marrë rrugën drejt Bullgarisë, aty ku drejtuesit e Sllavias së Sofjes e presin krahëhapur.

Xhani
Përfundimisht, përballë ngulmimit të palës bullgare është dorëzuar mbi të gjitha presidenti i Partizanit, Albert Xhani. Pikërisht, ai ishte shfaqur si pengesa kryesore për mosrealizimin e transferimit prej një periudhe që zgjati nga fundi i muajit janar deri në fundin e shkurtit. Të paktën sipas asaj që bëhet e ditur nga burime zyrtare, numri një i klubit të kuq ka pranuar si përfundim 50 mijë eurot që ofronte Sllavia, plus 30% përfitim të shumës, në rast se klubi bullgar do të shesë kartonin e Malindit në të ardhmen.

Lojtari
Ai që ka mbetur më i kënaquri duket se është vetë Malindi, i cili ka thënë se: “Një largim nga Shqipëria është një përfitim në disa aspekte, përtej asaj që më garantohet në këndvështrimin futbollistik”. Praktikisht, vetë futbollisti ka rënë dakord prej kohësh me drejtuesit bullgarë, për një marrëveshje që do të zgjasë 3 vjet. Gjithashtu mësohet se atij i është premtuar një apartament tërësisht personal në Sofje dhe një veturë, plus pagës që dihet se do të jetë më e mirë se ajo që merrte te Partizani. Gjithsesi është sidomos besimi, që kanë drejtuesit bullgarë gjëja që ngroh më tepër Malindin.

Partizani
Në këtë situatë, Partizani numëron një tjetër “mangësi” lojtarësh, pas largimit të Progrit në fund të vitit 2007. Sidomos, me këtë largim do të vuajë reparti sulmues, aty ku për momentin janë vetëm tre lojtarë. Kështu, veç Bakajt e Abilaliajt, me siguri trajneri Lika do të duhet të shtetet te sulmuesi i ri, Alban Dashi, me shpresën që të fillojë rritjen e një tjetër talenti si Malindi..

18 Mars 2008