Bledar Devolli, futbollisti i skuadrës së Partizanit rrezikon të dënohet me një vit pezullim dhe dy milionë lekë të vjetra gjobë, për veprimet që bëri të mërkurën në mbrëmje në derbin kundër Dinamos. Pas një sherri masiv që ndodhi kur kishte përfunduar ndeshja, lojtari goditi trajnerin e skuadrës kundërshtare, Ilir Dajën dhe rregullorja shprehet qartë se për një veprim të tillë ka masa drastike. Sipas pikës pesë të nenit 26 të Kodit të Drejtësisë Sportive, lojtari që godet me grushte, shkelma, apo mjete të tjera drejtues të ekipit kundërshtar, ose trajnerin, ai pezullohet një vit nga aktivitetet futbollistike dhe gjobitet me 200 mijë lekë të reja.

Shefi i Sektorit të Garave, Ilir Shulku ka kërkuar që të mblidhet sot paradite Komisioni i Disiplinës për të zbardhur ngjarjen e shëmtuar të derbit. “Nuk e di se çfarë vendimesh do të marrë Disiplina. Ajo që mund të them unë është se ishte një ngjarje e shëmtuar dhe se përgjegjësit do t’i nënshtrohen Disiplinës. Kam kërkuar që Komisioni të mblidhet nesër (sot) në orën 09.00, enkas për këtë çështje. Nuk mund të them më tepër”, ka thënë përgjegjësi i Sektorit të Garave në FSHF, Ilir Shulku. Sipas rregullores së Federatës, ndëshkim maksimal pritet të ketë gjithashtu për lojtarin e Dinamos, Bekim Kulin, i cili konsiderohet si iniciatori i sherrit të ndodhur, por edhe për lojtarë të tjerë që morën pjesë në atë shfaqje të shëmtuar.

Devolli: Ndjese publike per Dajen

I penduar për atë që ndodhi, gjë që dukej qartë nga një ngarkesë emocionale që e tregonte qartë në fytyrë. Bledar Devolli ka pranuar të flasë në lidhje me episodin, që e shikoi protagonist në fundin e derbit të së mërkurës. Megjithëse përveç fajit të vet ka dashur që edhe pala tjetër të pranojë provokimet e bëra: “Pas asaj që ndodhi, si unë, edhe pjestarët e tjerë të skuadrës jemi më të qetë. Kështu që përfitoj nga rasti për t’i kërkuar falje teknikut Daja, duke u nisur edhe se në atë moment isha disi i ngarkuar, pasi ndaj Dinamos ishte një ndeshje e tensionuar dhe gjëra të atilla mund të ndodhin. Prandaj shpresoj që çdo që të përfundojë me kaq”.

Por duket se Daja nuk ka dashur ta lërë me kaq, pasi ka ngritur padi në gjykatë për dhunim. “Nëse është kështu, edhe unë do ta denoncoj për ofendim në polici”, ka thënë mesfushori i Partizanit, i cili synon ta zgjidhë çështjen përmes fjalëve: “Kërkimin e ndjesës e bëj se e ndiej. Doja ta merrja Dajën në telefon që pas ndeshjes, por ishim ende në gjaknxehtësi e sipër. Besoj se këto ditë do të takohemi dhe mund të pi ndonjë kafe me të, për t’i kërkuar falje edhe personalisht”. Në lidhje me iniciatorët e sherrit, Devolli s’ka dashur të përmendë emra: “Kjo u takon ta zgjidhin organet kompetente, unë s’kam lidhje fare me këtë”.

Domethënës në këtë aspekt është fakti se me synimin për të sqaruar gjërat, dinamoviti Kuli ka shkuar dje paradite te “Tutoestetika”, ku lojtarët e Partizanit ishin duke bërë masazhe. Por të kuqtë nuk kanë preferuar ta afrojnë, përderisa ishin ende me inatin e fundit të derbit, ku një nga shkaktarët ishte pikërisht mesfushori kavajas i Dinamos. Ndërkaq, i pashmangshëm duket pezullimi i Devollit, përsa i përket planit sportiv: “Nuk e di nëse do të kem ndëshkim. Natyrisht, unë shpresoj të mos dënohem, pasi jam një futbollist që luan futboll prej më shumë se dhjetë vjetësh dhe nuk jam dënuar ndonjëherë. Uroj që këtë ta marrë parasysh Federata. Di të them se në këtë moment kam ndjerë së tepërmi mbështetjen e klubit të Partizanit dhe këtë do të kërkoj t’ia shpërblejë në fushë”.

Daja ka depozituar denoncimin të mërkurën

Ka kaluar menjëherë nga fjalët te veprat, trajneri dhe drejtori teknik i Dinamos, Ilir Daja. Menjëherë pas përfundimit të ndeshjes ndaj Partizanit, tekniku dinamovit shprehu qëllimet e tij për të denoncuar penalisht futbollistin e të kuqve, Bledar Devolli, e thënë e bërë për Dajën, i cili është nisur menjëherë për në komisariat, ku mësohet se ka bërë edhe denoncimin ndaj futbollistit të Partizanit, Bledar Devolli. Trajneri i Dinamos, të cilit i është dashur të durojë goditjet e gjirokastritit të të kuqve në përfundim të ndeshjes së Kupës, nuk ka reaguar në gjaknxehtësi e sipër, por i është drejtuar organeve kompetente, të cilat që tani e tutje kanë marrë përsipër të shqyrtojnë këtë çështje.

Bledar Devolli
Vendlindja: Gjirokaster
Datelindja: 15 Janar 1978
Pozicioni: Mesfushor

2007/08 - Partizani (21[21] nd, 1 gol, 0 as)
2006/07 - Teuta (28[28] nd, 2 gol, 3 as)
2005/06 - Elbasani/Skederbeu
2004/05 - Lushnja
2003/04 - Bylis/Tomori
2002/03 - Vllaznia
2001/02 - Tirana
2000/01 - Luftetari/Tirana .

14 Mars 2008