Më shumë se 100 mijë euro difer encë midis kërkesës dhe ofertës mbajnë Enco Malindin larg Sllavias së Sofjes. Sulmuesi 20-vjeçar i Partizanit, i cili prej gati një jave po zhvillon një provë në ekipin bullgar, u ka mbushur mendjen drejtuesve të Sllavias, që synojnë ta mbajnë. Megjithatë përballë tyre, ata gjejnë pengesën e presidentit të klubit të kuq, që zotëron kartelën e futbollistit. Saktësisht mësohet se oferta e bullgarëve është 40 mijë euro, plus gatishmërinë për t’i dhënë Partizanit si përfitim 30% të shumës, në rast lëvizjeje të mundshme të lojtarit nga ekipi bullgar. Një ofertë të tillë, Xhani e ka refuzuar, pasi kërkon të përfitojë plot 150 mijë euro nga shitja e lojtarit. Kjo shifër është gati 4-fish më e madhe, sesa ajo që ofron klubi bullgar, që kërkesën e njëshit të Partizanit e konsideron të ekzagjeruar.

Vata
Menaxheri Rudi Vata, i cili e ka dërguar Malindin për këtë provë në tokën bullgare, shpjegon për “Panorama Sport” situatën: “Në bazë të vlerësimit të tregut, Malindi nuk vlen më shumë se 40 mijë euro. Ky është statusi i lojtarit, që gjatë sezoneve të fundit nuk është aktivizuar shumë dhe as s’ka shënuar me bollëk, gjë që ndikon jo pak. Madje do të thoja se edhe aq sa kanë ofruar, për bullgarët është një rrisk, sepse nuk bëhet fjalë për një klub të pasur, por ka politikën për të rritur talentë, me synimin për t’i shitur më vonë sa më shumë, ndoshta edhe 500 mijë euro”. Domethënë, sipas Vatës, ky është një rast, për t’u shfrytëzuar, jo vetëm nga vetë Malindi, por edhe nga klubi i Partizanit. Ja që Xhani s’lëviz nga pozicioni i tij, pasi nuk dëshiron të presë, por synon të përfitojë sa më shumë tani. Kështu bisedimet kanë ngecur.

Lojtari
Gjithsesi ka ende pak shpresë dhe kohë, për arsye se merkato në Bullgari mbyllet më 28 shkurt. Nga sa mësohet, vetë lojtari duket i kënaqur me ambientin që ka gjetur te skuadra e Sllavias së Sofjes. Ka filluar të zërë miqësi aty dhe duket se do t’i pëlqente të qëndronte. Edhe drejtuesve bullgarë u ka hyrë në zemër, mbi të gjitha përsa i takon aspektit njerëzor. Kështu mbetet vetëm të gjendet gjuha e përbashkët midis dy palëve, gjë që për momentin duket e vështirë. Ndonëse, asgjë s’mund të quhet e mbyllur. .

31 Janar 2008