Jo aq i alarmuar prej situatës së krijuar te Partizani, sesa i tronditur me atë, që ishte shkuar për të dhe gjendjen në klubin e kuq gjatë shtypit të djeshëm. Pasi ka kaluar kufirin shqiptar gjatë orëve të paradites së djeshme (vinte nga Greqia), Albert Xhani menjëherë ka nxituar të blejë gazetat. “Mora telefonata nga miq e mi dhe u shqetësova, prandaj vrapova të marr vesh se ç’ka ndodhur – ka treguar në linjë telefonike për “Panorama Sport” -. Mund të them se lajme të tilla janë të sajuara. Uroj që kjo të bëhet pa dashakeqësi, megjithatë s’jam i bindur për këtë.

E kuptoj se Partizani përbën lajm për gazetat në çdo moment, sepse ka tifozllëk të madh dhe ngjall interes. Por s’është e drejtë të përdoret më kot, duke mbërritur deri në abuzim. Unë kam pranuar të shkruhet, edhe kur ka patur ndonjë lajm të keq, por jo të arrihet në sajesa”. Ndonëse i indinjuar jo pak, presidenti i kuq nuk ka nguruar të kalojë edhe në sarkazëm, teksa është shprehur: “Duke shikuar atë që ishte shkruar në shtyp më ngjau sikur po lexoja nekrologjinë time. ërtet m’u duk sikur kisha marrë fund e madje u çudita sesa dashamirës tregohen njerëzit kur njeriu vdes.... Sikur të ishin po aq dashamirës edhe kur je gjallë?”.

Gjithsesi, pavarësisht metaforës që është përpjekur të përdorë, ai vërtet vazhdon të jetë i gjallë dhe, të paktën me aq sa thotë, ende i rreh zemra për Partizanin: “Sot (dje) kam arritur në Shqipëri. Mund të them me siguri se skuadra do të marrë pagat brenda datës së premtuar, domethënë sot. Ndërsa më datë 13 do të niset për fazën përgatitore në Mal të Zi. Garantoj tifozët se nuk do të ketë asnjë problem. U bënë 10 vjet që gjendem në krye të Partizanit dhe mbaj mend se kemi kaluar kohë më të vështira se kjo. S’e kuptoj përse bëhet e gjithë kjo zhurmë”. Si përfundim edhe një përgjigje për të gjithë ata, që e konsiderojnë drejt fundit epokën e Xhanit te Partizani: “Nuk largohem kurrë. Kam kontribuar dhe do të vazhdoj të kontribuoj për këtë klub”.

Xhani: Antalia kunder rregullores
Në të njëjtën dallgë me stafin teknik të Partizanit shfaqet edhe presidenti Xhani, për zborin e programuar nga kombëtarja në Antalia të Turqisë. Madje, sërish ai duket i prirur të pengojë lojtarët e thirrur, siç bëri në të njëjtën periudhë të një viti më parë. “Vërtet klubet varen nga FSHF, por rregullorja thotë se grumbullimet lejohen vetëm në data zyrtare, jo atëherë kur ka dëshirë FSHF-ja – ka deklaruar për “Panorama Sport” -. Nuk mund të prishet programi i klubeve, sepse bëhet fjalë për një periudhë delikate. Ky është jo vetëm një shqetësim i imi, por i të gjithë klubeve”. Nëse do t’i lejojë apo jo futbollistët të marrin pjesë në këtë zbor, ende mbetet të shihet..

10 Janar 2008