Sikur të mos mjaftonte gripi, apo rrogat e papaguara prej tre muajsh, Partizanit i shtohet edhe problemi i “divorcit” me lojtarët. Një rast, që ka si protagonist Gerhard Progrin, i cili krejt papritur ka tërhequr të gjithë dokumentet nga klubi i kuq dhe tashmë s’është më një futbollist i Partizanit. Mësohet se gjatë një bisede sqaruese që ka patur futbollisti dhe i ati i tij me presidentin Xhani, ky i fundit e ka mbyllur çdo gjë me frazën “Merr letrat dhe shko ku të duash!”. Kjo ka qenë thjesht prologu i asaj që ka vijuar më pas, me reagimin publik të futbollistit dhe njerëzve që i qëndrojnë afër.

“Nga ora 23.00 e së mërkurës, Progri është një lojtar i lirë – ka konfirmuar i ati i lojtarit pr “Panorama Sport” -. Dua të sqaroj se kontrata është prishur në mënyrë të njëanëshme nga klubi, që ka shkelur rregullat, në bazë të asaj që ishte nënshkruar në marrëveshje. Dhe shkaktari kryesor për prishjen e kësaj ka qenë trajneri”. Një akuzë, që bazohet në faktet e ndodhura sidomos gjatë ndeshjeve të fundit të zhvilluara nga Partizani. “Në radhë të parë, Progri s’ka luajtur me vazhdimësi. E madje atëherë kur ka zbritur në fushë, nuk është aktivizuar në rolin e tij natyral, që është ai i sulmuesit. Çdo ndeshje ka patur një pozicion të ndryshëm. Për më tepër, ai është një pjesë fikse e Shpresave, ku së fundi është aktivizuar në mënyrë të suksesshme. Ndërkohë që në mënyrë paradoksale te Partizani, drejtuesit nuk kanë shfaqur besimin e duhur tek ai”. Për të mos folur pastaj edhe për aspektin financiar, që përbën një tjetër shkak kryesor, që solli këtë divorc disi të papritur të Progrit me klubin e kuq, aty ku praktikisht mund të thuhet se lojtari është rritur, duke filluar nga ekipet zinxhir. “Kontrata e sezonit të vjetshëm është shlyer në masën 47%, kështu që pjesa më e madhe duhet ende të na jepet – vazhdon të tregojë babai i futbollistit -. Ndërsa për këtë sezon konfirmoj se janë tre muajt e fundit pa u marrë”. Në këtë situatë nuk përjashtohet që futbollisti të dërgojë klubin në gjyq.
Ndërkohë që pasi duket përfundimisht e mbyllur aventura e tij me Partizanin, në mënyrë të pashmangshme për Progrin do të nisë merkato. Dhe pritet të ketë interes të madh përreth tij, meqënëse pjesa më e madhe e skuadrave të Kategorisë Superiore kanë deklaruar se kanë nevojë për përforcime. Hapa konkretë për momentin flitet se kanë bërë Elbasani, Teuta dhe Besa. Sidoqoftë çdo gjë pritet të bëhet paksa më e qartë me fillimin zyrtar të periudhës së transferimeve dimërore. .

28 Dhjetor 2007